دوالیزم

بە نیازم بابەتەکانی خۆم ، ئەوانەی بە کوردی نووسراون ، بە ناوێکی بێگانەوە بڵاو بکەمەوە و لە ژێریدا بنووسم وەرگێرانی کازیوە ساڵح، ئەگەر ئەوەیان زۆر مەحاڵ بوو ، ساڵح ەکە ئەکەم بە ساڵحی :))














بەو بۆنەیەوە ئەم شیعرەی قانع پێشکەش

بێ حەیایی باوە ئەمڕۆ قوڕ بەسەرداکا حەیا

کەندەڵان سەربەرزو شادە خۆی بشارێتۆ چیا

گوڵ ئەگەر ئەقڵی ببێ سەر لە خاک ناکاتە دەر

چونکە ڕۆژی دڕک و داڵەو گەرمی بازاڕی گیا

با لە هەورا سەرنقوم بن مانگ یان خۆری جوان

شەمشەمە کوێرەش ئەڵێ من نامەوێ شوعلەی ضیا

ئەی فەلەک ڕاستۆ نەبی بۆ ڕێک و پێکی دەورەکەت

گورگ ئەبێتە شوانی ڕان و دز ئەبێتە ئەولیا

نێرەگا جوتێ ئەبەیتە ڕیزی لوقمانی حەکیم

فەیلەسوفێکیش ئەخەیتە دەس چەپۆکی ئەشقیا

قانع

دوالیزم

ئەو هەموو بانگەشەی بۆ دژە گەندەڵی کرا لە چەند ساڵی رابردوودا، لە راستیدا زۆربە بانگەشە بوون دژی گەندەڵی لە پێناو بە دەستهێنانی گەندەڵیدا، واتە بۆ بە دەستهێنانی ئەوەی گەندەڵ هەیبوو، نەک بنبڕکردنی، ئەگینا ئەو ژمارە زۆرەی بانگەشەکاران گەر بە ڕاستی دژی گەندەڵی بونایە کوردستان نەئەگەشت بەم ئاقارەی ئێستا

چیرۆکی خەمناکی خەمێ

زۆرەدەسگرتەکردنی ژنانی ئێزیدی: چیرۆکی خەمناکی خەمێ

کازیوە ساڵح

بۆچی ' خەمێ' ؟

- ئاخر ژیانم هەمووی بوو بە خەم

    خەمێ ی ١٥ پازدە ساڵ خەڵکی دێی کوڕە عەبدو  ی ناوچەی شنگال. بە بێ دایک و باوک گەروە بووە ، باوکی مردووە و دایکی شووی کردوەتەوە و سێ برا خوشکێک ، براکان کە پزیشک و ئەندازیارن سەرنگوومن و خوشکەکەشی پاش خۆی لە دەستی داعش ڕزگاری بووە و گەڕاوەتەوە کوردستان. دڵنایکردنەوەی تەمەنی لێ ئەکەمەوە، چوون بە جەستە و ڕوخساریش لە دە ١٠ ساڵ ئەچێت نەک پازدە، " ئەوسا ئەوەندەش لاواز نەبووم، بەس لەوێ لە برسیەت و ژێر سزاداندا وام لێهات". ڕوخساری زیاتر لە ئێرلەندی ئەچێت هەتا کورد. لە یەکەم نێگادا زیرەکیەکی بێ سنووری لە چاو و سیمادا بە دی ئەکەیت، لەو جۆرەی ئەگەر مامۆستا بیت ویەکەم جار ئەچیتە پۆلەوە، یەکەم دیدەبینیت بۆ خوێندکارەکانت لە روخساریاندا گەڵاڵە ئەبێت، خەمێ ئەو جۆرەیە کە ئەڵێیت ئەمەیە ئومێدی پۆلەکە. هەمیشە زەردەخەنەیەکی لە سەر لێوە، خەم لە چاوەکانییەوە سەرەتاتکێ ئەکات، بەڵام زیرەکی و پاکێکەی زاڵە بە سەریدا.پاکیەکی مناڵانە لە چاوەکانیەوە بوڵق ئەدەن کە ئەو جۆرەم پێشتر لە کەسێکدا نەبینیوە لە تەمەنی ئەودا بێت، بۆیە ئەپرسم، ژیان پێشتر لای تۆ چی بوو؟                                                                                                        

          

- نازانم، من بەس ئەمزانی بچم بۆ قوتابخانە، نەمئەزانی خەڵکی وا هەیە و  ژیان ئاوایە. 

    

      باسکردنی ' خەڵکی وا' و 'ژیانی ئاوا' خەڵکی بەو شێوە و ژیانی بەو شیوە بە چەندین کتێب کۆتایی نایەت، لە تەک خەمێ ئەبێت بۆ ئێستا بەرد بخەینە سەر ئەم خەمەیان. وەکو خۆی ئەڵێت ماڵیان نزیکی شاخ بووە و کاتێک داعش دێتە دێیەکەیان بە شەش ئۆتۆمبێل دێیەکەیان تاڵان ئەکات وهەرچیان هەیە ئەیبەن ، ئەوان نزیکەی ١٠٠ سەد کەس بوون و هەمووش زیاتر خزم بوون و ماڵی مام و پورەکانی هەموو لەوێ ژیاون. " قاچی پیاوەکانیان بەستەوە ، ژن لە شوێنێک وپیاو لە شوێنێک بەند کرا " و پاشان دەیانبەن بەرەو دێێ سەیوان شێخ خدر ، شەوێک لەوێ بەند ئەکرێن و جەندین جار دێنە ناویان داوایان لێ ئەکەن ئاینی خۆیان بگۆڕن ، ئەگەر نا دەیانکوژن." نازانین چییان لە پیاوەکان کرد ، بەڵام ژن وکچەکانیان برد لە داوێنی شاخی شنگال حجز کراین، هەزاران کەس لەوێدا کۆکرابوونەوە ، شەو باسی گەورەیان هێنا و بردینیان بۆ تەلەعفەر لە قوتابخانەیەکەدا بۆ یەک شە دایناین، خەڵککە ئەوەندە زۆر بوو ، هەر سێ نهۆمی قوتابخانەکەو تەنانەت حەشەکەشی پڕ بوو لە خەڵک"                                              

         پاشان دەیانبەن بۆ موسڵ و پاش ئەوەی مناڵە نێرەکان لە شەش سالێ بۆ سەرەوە دەبەن ، دوای ژنە بە تەمەنەکان دەبەن ، پاشان ژنە خاوەن منالەکان ئەبەن و  تەنها کچەکان دەمێننەوە . بەر لەوەی کچەکان ببەن ئەو شەوە فرۆکە ئەو شوێنەکەتێیدا بەند کراون بۆمباران ئەکات، بۆیە جاریەکی دی دەیانگەڕێینەوە بۆ تەلەعفەر و لە هەمان قوتابخانەدا دایان دەنین ، " ئەمجارە کۆمەڵێک داعشی دار بە دەست هاتن وهەر کەس جوان بوایە ئەیانووت تۆ وەرە ، ٦١ شەست و یەک کچیان لێ هەڵبژاردین و بردینیان بۆ موسڵ ، دەرگای ماڵێکی مەسیحیان شکاند و ماڵێکی گەورە بوو داگیریانکرد و شەوێک لەوێ ماینەوە و بەیانی بردنیان بۆ سوریا بۆ رقە، لە باسێکی دیکەشدا شەست کچی تریان هێنابوو ئەویش لە هەمان کاتدا بردنیان لە گەڵ ئێمە".                                                              

  بەو ژمارەی خەمێ باسی ئەکات ژمارەی ئەو کچە ئێزیدیانەی لە تەلەعفەرەوە ئەیانبەن ١٢١ سەد و بیست ویەک کچ ئەبن و بەڵام کاتێک دەبرێنە هۆڵێکی گەورە لە ڕقە ژمارەیەکی زۆری تریش کچی لێ ئەبێت ، " هەموویان ئێزیدی بوون ، داعشەکان ڕۆژانە ئەهاتن سەرەتا مناڵەکانیان ئەبرد لە ١٠ دە ساڵەوە بۆ ١٣ سیازدە ساڵان ، پاشان لە ١٤ چواردەوە بۆ ٢٠ بیست ، کە خۆشم بەر ئەو وەجبەیە کەوتم ، گروپێکیان ئەفرۆشت و وگروپێکی دیکە کچیان ئەهێنا ، ئەوانەی جوان نەبوون نەئەکڕان، لە بەر ئەوە پاسەوانەکان خۆیان بە خراپی سزایان ئەدان لێیان ئەدان و دەستدرێژییان ئەکردە سەریان"                                                

_چۆن پێناسەی ئەو هۆڵە ئەکەیت و چۆن بوو؟                                                                 

_ هۆڵێکی گەورەی دوو نهۆم بوو، لە سەری نووسرابوو میسر ، لە ناو دارستانێکدا بوو ئاوێک بە بەردەمیدا ئەڕۆشت.                                                                                      

       " کەسێکی کەم ئەندام ، والی حمس و خەڵکی ئەدلە بوو ، خۆم خوشکەکەم و وئامۆزاکەمی کڕی، لە ماڵەکەیدا ٤ چوار ڕۆژ دەرگای لە سەر داخستین، کە ئێمە گەشتین ٤ چوار کچی تریشیان بۆ هێنا بوو ،  بەرگی داعشیان پێ لە بەرکردین و من و خوشکەکەمیان برد بۆ بینایەکی تاریک ، ٦ی شەشی بەیانی بردینیان بۆ دیمەشق، ، کەسێکی شیشانی قژن وتی ئنگلیزی ئەزانی وتم نا ، وتی تورکی ئەزانیت وتم نا

عەرەبی ئەزانن وتم نا، کەسێک هات تەمەنی ٦٠ ساڵ بوو خەڵکی مە‌غریب بوو،  چیشتخانەکەیان زۆر پیس بوو ، وتیان پاکی بکەرەوە دەستم کرد بە پاکردنەوە ، ٦٠ ساڵکە هات دەستی خستە سەر شانم وتی تۆ باوکت نەبووە من لە جێگەی باوکتم دوای هەر ئەو پیاوە وتی وەرە ئێرە ئیشێکم پێتە بۆ ناو ژوورەکەی خۆی ، وتم نایەم، بە قژ ڕاکێسام هەتا ژوورەکەی خۆی ، مەحاولەی دەستی درێژی کردە سەر من  و خوشکەکەم هەر هەوڵی ئەدا بەڵام ئێمە بەهێزتربووین ، خوشکەکەم ڕیشی ڕاکێشا ، ئازاری پێگەشت وهاواری لێ هەستا ، ئنجا بانگی پاسەوانەکەی خۆیکرد ، بە هەردووکیان دەست و قاچیان بەستین و لێیانداین هەتا بێ هۆش بووین، کە بە ئاگا هاتینەوە دەستدرێژی کردبووە سەر هەردوکمان. نازانین هەر خۆی بوو یان پاسەوانەکەشی "                                                        
  - کاتێک رووبەڕووی دەستدرێژی ئەبویتەوە، چ خواستێک، خەون و ئاواتێک بە مێشکتدا خێرا گوزەری ئەکرد؟
-سەیری پەنجەرەکەم ئەکرد و حەزم ئەکرد ببم بە باڵندە بۆ ئەوەی لە کونێکی بچوکەوە دەرباز بم و بفڕم بۆ شوێنێکی دوور.                                                                                                        

سزاکەیان بە دەستدرێژی کۆتایی نایەت و هەردووکیان لە ژوورێکدا کە بە تۆڕ دەوری گیراوە زیندان ئەکات و ڕۆژی یەک جار بوتڵێک ئاو سەندەویچێکیان بۆ فڕێ دەدرێت بۆ ماوەی پێنج مانگ، خەمێ ئەڵێ، "پاش پێنج مانگ هەمان پیر هاتەوە لامان ، وتی ئاینەکەتان بگۆڕن و شووم پێ بکەن ، ئێمەش وتمان بشمانکوژن نە ئاینی خۆمان ئەگۆڕین و نە شوش بە تۆ ئەکەین ، ئەگەر ئەوەندەش فشار بخەنە سەرمان خۆمان ئەکوژین، ئیتر ئەویش پەتێکی بۆ فڕی داین وتی بەو پەتە خۆتان بخنکێنن، چوونکە ئەگەر نەبن بە موسڵمان لێتان ئەدەم و ئەتانفرۆشمەوە"                                                            

         لە هەمان کاتدا بانگی پاسەوانەکەی ئەکات ، "بڕۆ ئەو دوانە بفرۆشە و پارەکەی بنێرە بۆ خێزانەکەم و مناڵەکانم" مناڵ و خێزانی لە مەغریبن. ئەویش وەکو کۆیلە بە کەسێکی شەست ساڵی تریان ئەفرۆشێت ناوی یوسف ئەبێت و پاش ماوەیەک لە شەڕدا ئەکوژرێت. لە ماڵی یوسفدا ژنێکی دیکەی ئێزیدی دووگیان و چوار مناڵیشی هەیە ڕاگیراوە . کاری خەمێ لەو مالەدا قورستر ئەبێت ، چوونکە جگە لە لاقەکردن هەتا یوسف ئەچێت بۆ شەڕ ، لە تەک ژنە دووگیانەکەی دیکە و خوشکەکەی بە ڕۆژ هەتا ئەوان ئەگەڕێینەوە ئەمان خەریکی جل شتن و خواردن دروستکردن و ماڵ پاککردنەوەن ، کۆمەڵێ ژنی داعشی لێ ئەبن، ئەمانە هەموویان بەیانیان زوو ئەڕۆن و شەوان ئەگەڕێننەوە، کە ئەگەڕێننەوە خەمێ و ئەوانی دیکە پیوسیتە قاچیان بخەنە ئاوی گەرمەوە، دەستس و قاچیان بۆ ن بشۆن  و بیانشێلن. خەمێ ئەڵێت ، " هێشتا داعشە پیاوەکان لە داعشە ژنەکان دڵ نەرمتر بوون  ، ژنەکان زۆر زۆریان لێ ئەداین، ئێمە خۆمان لە ژێر کاردا ئەوەندە ماندوو ئەبووین ئاگامان لە خۆمان نەئەما هەتا شەو ، شەویش کە ئەوان ئەگەڕانەوە پاش ئەوەی خزمەت وشێلانی خۆیان تەواو ئەبوو لێیان ئەداین"                                                                                        

- ئەڵێن ژنی دووگیان و مناڵدار لاقەنەکراوە ، ئایە  چۆن مامەڵەیان لە گەڵ ئەو ژنە دووگیان ئەکرد کە لە ماڵەکەی یوسفدا بوو؟                                                                                                

- ئەوە راست نیە ، ئەوان یەکەم جار بە مناڵەکان دەستیان پێکرد کە مناڵ وکچی شوو نەکردوو تەواو بوو ئنجا بە ژنە مناڵدارەکانیش ، راست نیە ، دەستدرێژییان کردە سەر تەنانەت پیرە ژنیش، سیانزە ساڵێک ٦ شەش کەس لاقەیانکردبوو ، ئێمە لەوانی ترمان ئەپرسی لە هۆڵەکە ، یوسف لە بەر چاوی من و ژنەکانی دیکەش ئەو ژنە دووگیانەی بردە ژوورەوە و لاقەکرد و لێیشی ئەدا، قیژەی هەموو گەڕەکەکەی گرتبوو، هەر چوار مناڵەکەش لە دەرەوەی دەرگاکە ئەگریان و بە هەردوو دەست بە دەرگاکەیان ئەکێشا بۆ ماوەی زیاتر لە کاتژمێرێک.                                                                                     

          پیویست ناکات  بپرسم بە تەنیشت ئازاری نەوتراوی خۆتەوە، کارەساتی ئەو ژنە چەند کاریگەری لێکردوویت، کە لە کاتی گێڕانەوەدا دەستێک ئەخاتە سەر گوێی ڕاستی و بە دەستی چەپیشی پاڵ ئەنێت بە مێزەکەی نێوانمانەوە، ئاماژەیە بۆ ئەوەی کە جاریەکیدیکە دەنگی ئەو ژنە ومندالەکانی لە گوێیدا دەزرنگێتەوە و ئەژێتەوە، پێ ئەچێت ئەو یەکێک لە ژوورەکانی تاواندا، یان ئەو تەوالێتەی کە دواجار ئەبێت بە هۆی ڕزگاربوونی  بە هەمووی هێزی دەستە لاواز و بچووکەکانی پاڵی بە دەرگاوە نابێت بۆ ئەوەی خۆی لە گورگە داعش بپارێزێت.                                                                                         

-چەند لەو شوێنە مایتەوە؟                                                                        

-هەمووی ٩نۆ مانگ ٤چوار ڕۆژ لەو ماڵە و ٥پێنج مانگ لە حەپسەکە بووم.                        .   

       بە پێی گەواهیدانەکانی خەمێ، ژنە ئێزیدیە کۆیلەکراوەکان زیاتر لە تەلەعفەر و میادین وحەلەب وەدابەش ئەکرێن وئەفرۆشرێن بە سەر ناوچەکانی دیکەدا. کە یوسف دەچێت بۆ شەڕ بۆ عێراق ماڵەکە پاسەوانی نامێنێت  ، یەکێک لە ژنە داعشەکان مناڵێکی ئەبێت ، خەمێ لە ڕێگەی منالەکەوە مۆبایلی ژنەکە بە دەست ئەهێنیت و لە تەوالێتەکەدا و لە مۆبایلەکەوە فەیس بووک ئەکاتەوە و نامە دەنێرێت بۆ کەس و خزمی خۆی لە کوردستان، ئیتر لێرەوە  چیرۆکی چۆنیەتی ڕزگار بوونی با بمێنێت بۆ پاش ڕزگار بوونی کورد لە دەست داعشە هەمە چەشنەکان.                 .                                                                                               

__- تێ بینی: -بە هۆی پابەند بوون بە لایەنی یاسایی و ئەتیکی لێکۆڵینەوە وێنە و ناوی ڕاستەقینە ئاشکرا ناکرێن و هەر کچێک داوام لێکردووە ناوێکی خوازراو کە خۆی پێێ خۆشە هەڵبژێرێت . .. ئەم دیدارانە لە بنەمادا بە  کوردی-سۆرانی نەکراون، بۆیە داڕشتنەوە کوردێکە زمانی منە نەک ئەوان. ...بۆ دروستی ناوی دێیەکان ڕاوێژم لە گەڵ نووسەری بەڕێز تەها سلێمان کردووە بۆ ئەوەی بە  دروستی بنووسرێن.                                                                                                           

زۆرەدەسگرتەکردنی ژنانی ئێزیدی : چیرۆکی بەهار

زۆرەدەسگرتەکردنی ژنانی ئێزیدی : چیرۆکی بەهار

کازیوە ساڵح

بە ڕاوێژ لە گەڵ بەڕێز مامۆستا حەمەفەریق حەسەنی نووسەر وشەی' زۆرەدەسگرتەی' م هەڵبژارد بۆ دەستدرێژی سێکسی، ئەمە وشەیەکی هەورامی کۆنە. ئەم جۆرە دەستدێژییە  کە بە عەرەبی پێێ ئەوترێت اغتصاب و بە ئنگلیزی رەیپ، هەردوو وشە عەرەبی و ئنگلزێکە بۆ ناونانی ئەو پرۆسەیە گونجاوە چوونکە زۆرە مڵی وبە زۆر کردارکردنی تێدایە. بەم دواییە بە کوردی وشەی ' لاقە ' هاتوەتە ناو زمانی کوردییەوە، نازانم کێ و بە چ واتایەک ئەم وشەیە داتاشراوە، ڕەچەڵەکی وشەکە نازانم، بەڵام ئاوازەکە و واتاکەی هیچ بە زۆرێکی پیوە دیار نیەو زیاتر پێ ئەچێت واتای' لاق کردنەوە' بکات ئەمەش پێناسەی کارەساتەکە نادات. لە هەمان کاتدا ئێمە ناتوانین هەموو جار دەسترێژیکردنی سێکسی بەکار بهێنین چونکە ئەو کات لە بری چەمک ئەبێت بە ڕستە بۆیە لە ئیستادا' زۆرەدەستگرتەی' بە کار ئەهێنم، خوازیارم لە داهاتوودا وشەیەکی ئاسانتر و پڕ ماناتر بدۆزینەوە.                                                                                                                          

- بۆچی بەهار؟                          

- کە لای داعش گیرابووم زوو زوو بیرم لە لاپاڵی سەوزی دێیەکەمان ئەکردەوە لە بەهاردا، لە خۆمم ئەپرسی بکرێت ڕۆژێک بیبینمەوە.                              

       ڕوخساری زەرد ولاشە لاواز و  بچووکەکەی بەهاری سیازدە (١٣) ساڵ  ، وێنای ئاسكێکی برینداری دەم ڕەوە گورگی بیابانی ئەنەخشان.  کاتێک داعش گوندەکەیان  'کۆجۆ' داگیر ئەکات، ئەو بۆ پۆلی دووی ناوەندی دەرچووبوو، لە نسێی ماڵە گەورەکەیاندا کە بیست وهەشت (٢٨) کەس ، مناڵی دوو ژنی باوکی و ماڵی مامەکانیشی لە خۆ گرتبوو بەختەوەرانە ڕۆژەکانیش وەکو پۆلی قوتانخانەکەی پڕ قەرەباڵغی و هاورێ و بزوێ بوو. لەو بیست و هەشت کەسە دە کەسیان تا ئێستا بێ سەرو شوینن بە برا گەورەکەی خۆشییەوە کە لە ساڵی ١٩٨٨ لە دایک بووە ، هەژدە کەسیشیان گەڕاونەتەوە بۆنێو 'نیوە' ژیان. بەهار وتی، " هەرگیز کێشەمان نەبوو، نازانین باوەژن و دایکی ڕاستەقینە مانای چیە ، جوونکە دایکم و ژنی دووەمی باوکم زۆر باش بوون بە یەکەوە... ئێمە { ئێزیدیەکان}خەڵکێکی بێ کێشەین ، ماڵی وامان هەبووە تا چل کەسیشی تیا ژیاوە بە بێ کێشە و ئاژاوە.                                                                                                   

     ڕۆژی ٣-٨-٢٠١٥ کە دەنگۆی گەشتنی داعش دەگات پێیان بڕیار ئەدەن کە دێیکەیان بە جێ بهێڵن و ڕووبکەنە شاخی شنگال، بەڵام پێیان ئەوترێت کە ڕێگەی دەرچوونیان لاوازە، چوونکە داعش زۆر نزیکە لە دێیکەوە و لە ڕێگە ڕووبەڕوویان ئەبنەوە. زۆر بە سەر ئەم کێشمەیەدا تێ ناپەڕێت داعش دەگاتە گوندەکەو پێیان ئەڵێت نەترسن ونەچن بە هیچ لایەکدا ئاسایشیان دەپارێزن. بەڵام لە هەمان کاتدا ئەچنە لای شێخی دێ یەکەیان و داوای لێ ئەکەن خەڵکەکەی رازی بکات واز لە ئاینی خۆیان بهێنن وبچنە سەر ئاینی ئیسلام. ئەویش لە وەڵامدا داوای دوو ڕۆژ مۆڵەتیان لێ ئەکات بۆ ئەوەی پرس بە خەڵکەکەی بکات و نیازی داعش بە ئەوان بگەیەنێت وئازادیان بکات لە بڕیاردان و پاشان وەڵامیان لێ بگەڕێنێتەوە.                                                                                          
  دوو ڕۆژ ئاوا دەبێت و داعش لە نیازی خەڵکەکە تێ دەگات " مردنمان پێ باشترە لە واز هێنان لە ئاینی خۆمان " داوا لە خەڵکەکە ئەکات کە هەرچی پارە شمەکی گرانبەهایان هەیە لە گەڵ خۆیان بیبەن بۆ قوتابخانەکەی کۆجۆ ، وە داوا ئەکەن ئەوانەی ئۆتۆمبیلیان هەیە بە ئۆتۆمبێل بڕۆن، " چوونکە لەوێوە دەتانبیەن بۆ شاخی سنجار بۆ لای ئێزیدیەکانی تر ، بۆ ئەوەی ئەگەر شەڕ لە ناو دێیەکەدا ڕوویدا خەڵکی مەدەنی نەکوژرێت"                                                                              

لە حەوشەی قوتابخانەکەدا هەموویان ڕائەگرن ، سەرەتا داوا ئەکەن هەرچی پارە و شمەکە گرانبەهاکانیان دابنێن، لە گەڵ کلیلی ئۆتۆمبێلەکانیان، تەنانەت ئەڵقەی هاوسەرگیریشیان لە دەست ئەکەنەوە ، لە مۆبایل و کۆمپیوتەر دایانئەماڵن ئەمەش ڕێگەی هەموو پەیوەندێکیان لە گەڵ دنیای دەرەوە ئەپچڕیت.پاشان پیاوەکان ئەکەنە نهۆمی یەکەم و ژن و مناڵەکانیش ئەکەنە نهۆمی دووەمی قوتابخانەکە. پاش تاوێک گوێیان لە دەستڕێژی گولەباران ئەبێت کە لە نهۆمی خوارەوە دێتە گوێ ، تێ ئەگەن کە پیاوەکانیان کۆشت.                                                                                      
لەو قوتابخانەوە ژنەکان و مناڵەکان دەبەنە پەیمانگایەکی نوێ کە هێشتا بونیادنانی تەواو نەبووە، بۆیە ناویشی لە سەر نەبوو . کاتژمێر (٨)  هەشتی شەو" هەموو ژنە جوانەکان وکچەکان لە تەمەنی نۆ ٩ ساڵی بۆ سەرەوە جیاکردەوە ، کورەکانیش لە تەمەنی شەش ٦ بۆ ١٥ پازدە ساڵی لە دایکیان وەرگرتن و بردنیان بۆ تەلەعەفەر و ئێستا کە گەڕامەتەوە تێگەشتم کە کورەکان راهێنانی { داعشیان} پێکراوە " بەهار وتی.                                                 

کاتژمێر ١١.٣٠ یازدە ونیوی شەو كچەکان دەبن بۆ شاری موسڵ ولە خانویەکی سێ نههۆمی گەورەدا دایان دەنێن کە نزیکی مزگەتی گەورەی ساری موسڵ دەبێت و لەو خانوەدا ١١٤ سەد و چواردە کچی ئیزیدی دیکەی تێدا دەبێت.                                                                                                                     

پاش دوو ڕۆژ ٥٧ پەنجاو حەوت کچیان، یەکێکیان بەهارە دەبەن بۆ سوریا و لە نێو هۆڵێکی گەورەدا دادەنڕێن کە کەوتوەتە نێودارستانێکی گەورە و جەنگەڵ ، پشتەوەشی شاخە ، چری دارەکان دیمەنێکی ترسناکی و ئومێد بڕی پێ ئەبەخشێت کاتێک بەهار بیر لە ئەگەری ڕاکردن ئەکاتەوە. کاتێک ئەمان ئەگەن  ٢٠٠ دوو سەد کچی دی لەو شوێنەدا ئەبێت ، بە هەموویان یەک خۆشۆرو و یەک تەوالێتی تێدا ئەبێت . لە دەرەوە دەرگای هۆڵەکە بە کلێکی گەورە دائەخەن کە بە زنجیریەکی ئەستورەوە بەستراوە بە ئۆتۆمبێلێکەوە لە بەر دەرگاکەدا بۆ ئەوەی کەس نەتوانێت دەرگاکە بشکێنێت و ڕا بکات. لە دەرەوەش چەند ژوورێکی بچووک دەوری هۆڵەکیان گرتووە و لەو ژوورانەدا پاسەوانەکانی ئەو هۆڵە دژین.                                                                                                                        

هەتا ئێرە بەهار زیاتر چاوانی دەبڕێ سەقفی ژوورەکەوە وەکو ئەوەی لە سەر تەختە سپی ئەو ژوورە یادەوەریەکان بە هێڵێکی رەش نووسرابنەوە .هەر جارەی بە دەستێکی  پەنجەکانی دەستەکەی دی ڕادەکێشا  و دەتەقێنێت  وەک بیەوێ هەرچی سەهۆڵی دوودڵی و دلە راوکێیە لە ژێر پەنجەکانیدا ورد بکات.                                                                                            

"هەموو ڕۆژێک پیاوێک یان چەند پیاوێک ئەهاتن، دارێکی درێژ بە دەستی چاودێرەکەوە بوو دەیخستە ژێر چەناکەمان و سەری پێ بەرز ئەکردینەوە بۆ ئەوەی پیاوەکان دەم و چاومان ببینن، چەند جوان بوایە ئەوەندە زیاتر و زووتر ئەکڕا  من و کچە مامەکەم و کچێکی دی ئێزیدی خەڵکی کۆجۆ بردنینیان بۆ بنکەی " ئیفتدا" پڕی بوو لە پیاو . لەوێوە داعشێکی سعودی ناوی ئەبوو مالک بوو کڕیمی ، تەمەنی لە سەروو چل ساڵ دەبوو ، ڕیش و قژی درێژ و چڵکن و ڕوخساریەکی زۆر ناشرین. بردمی بۆ ماڵی هاوڕیەکی، چوونکە خۆی ژن و مناڵی هەبوو لە ماڵی خۆیدا... لە ماڵی هاوڕێکەیدا دوو ژنی داعشی هەبوون ، ئەوان لە ماڵ دەرچوون و... لە ماڵ دەرچوون و ..."                                                                                        

نیگاکەکانی بەهار لە سەر سەقەفەکە ئەگوێزرێنەوە بۆ سەر زەوێکە، قاچەکانی ئەنووشتێنێتەوە بۆ ژێر کورسێکەی و هەوڵدەدات لە  ژێرەوە گرمۆڵەی بکات و لە زەویان ببڕیت ، بە دەستەکانی بەردەوام قۆڵی کراسەکەی ڕائەکێشیت بە سەر دەستیا وەکو ئەوەی بیەوێ لەشی لە کەڵپەی ژەهراوی بشارێتیەوە، تۆنی دەنگی ئەگۆڕێت بۆ غەمبارتر ، نزمتر و هەناسەکانی کورتر دەبن و بەردەوام ئەبێت ، " پاش ئەوەی ژنەکان ڕۆشتن،  لاقەی کردم ، لە بەر ئەوەی هەڵمدا بەرگری لە خۆم بکەم ئەوەندەی لێدام بورامەوە. "                                                                     

                                                           

بەهار لە پاڵ لاقەکردندا  ڕۆژەکانی بە گریان ، خزمەتکاری و پاڕانەوە بۆ ئەوەی بیبەن بۆ لای خوشکەکانی دی بە رێ ئەکات. ئەوان داوای لێ ئەکەن خواردن دروست بکات ، جل بشوات و ماڵ خاوێن بکات ، بەهاریش ئەو کارانەی پێشتر نەکردووە و نەیزانیوە ، بۆیە ژنە داعشیەکان زۆر جار لە پیاوەکان خراپتر چەوساندویانەتەوە و لێیانداوە هەتا فێر بووە.  ئەو کاتانەی ئەو داعشە ئەچێت بۆ کۆبانی ئەیباتە لای خوشکەکان و کچە ئێزیدیەکانی دی ، لەوێش ماڵەکانی دی ڕۆژانە ئەیانبەن بۆ خزمەتکاری  ناو ماڵ هەتا داعشەکە لە شەڕ ئەگەڕێتەوە.                                                                                                                       

بەهار چوار مانگ و دە ڕۆژ لە ماڵی هاوڕێ کەی ئەبو مالک ئەمێنێتێتەوە ، ئەبو مالکیش هەموو ڕۆژێک ئێواران ئەچێت بۆ ئەوێ بەر لە گەڕانەوەی بۆ ماڵی خۆیان. هەتا ڕۆژێک کە ئەبو مالک ئەچێت بۆ شەڕ و ئەویش لە گەڵ کچێکی دی ئێزیدا ئەبرێن بۆ ماڵێک بۆ خزمەتکاری. کاتێک ژن و پیاوەکە دەر ئەچن لە ماڵ هەلی ڕاکردنیان بۆ هەڵئەکەوێت ، بۆیە پۆشاکی داعش لە بەر ئەکەن و ڕائەکەن، ماوەیەکی زۆر بە پێی ئەڕۆن، پاشان داوا لە شۆفێرێەک ئەکەن بە ئۆتۆمبێلەکەی بیانبات بۆ سنوری تورکیا ، کچە ئێزیدیەکەی دی هەندێک پارەی پێ ئەبێت داوا لە شۆفێرەکە ئەکات مۆبایلێکی بۆ بکڕیت . ئەو پێی وایە ئەوان داعشن ، بۆیە کارەکانیان بۆ جێ بە جێ ئەکات و هەتا سنووری تورکیا ئەیانبات. شاخەکانی سنووری تورکیا بە پێێ پەتی و  چوار کاتژمێر ئەبڕن و لە سەر سنوور خێزانێک ئۆتۆمبیلێک بۆ خۆیان ئەگرن بۆ ناو شارەکانی تورکیا، هاوکاری ئەوانیش ئەکەن وجێگەیان ئەکەنەوە و لەویشەوە پەیوەندی بە کەس و خەڵکی خۆیانەوە لە کوردستان ئەکەن.                                                                                           

      بەر لە جینۆسایدی ئێزیدیەکان لە لایەن  داعشەوە ، بەهار خەونی بوو ببێت بە پزیشکی گشتی ، ئێستا پێی خۆشە ببێت بە پزیشکی ژنان ، بەڵام  لە مانگی ١ی ٢٠١٥ وە گەڕاوەتەوە و من مانگی ٨ی ٢٠١٥ دیدارم لە تەک ساز کردووە ، پاش هەشت مانگ هێشتا نەگەڕابووە بۆ خوێندن ، چوون خزمەتی خوێندن و گەڕانەوە بۆ ژیانی ئاسایی خۆیان کە بەشێکی گەورەی چارەسەرەکردنی گرفتە سایکۆلۆژیەکانی پاش کارەساتی دەستدرێژییە  هێشتا نەبووبوو  بە غەم.                                                                         

____- تێ بینی: بە هۆی پابەند بوون بە لایەنی یاسایی و ئەتیکی لێکۆڵینەوە وێنە و ناوی ڕاستەقینە ئاشکرا ناکرێن و هەر کچێک داوام لێکردووە ناوێکی خوازراو کە خۆی پێێ خۆشە هەڵبژێرێت . ..